०५ चैत,काठमाडौं - अमेरिका–इजरायल गठबन्धनसँग तनाव चुलिँदै जाँदा इरानले मध्यपूर्वमा आफ्नो रणनीति परिवर्तन गर्दै ऊर्जा संरचनामाथि केन्द्रित आक्रमण तीव्र बनाएको छ। अन्तर्राष्ट्रिय सञ्चारमाध्यम अलजजिराका अनुसार कतार र साउदी अरेबियाका महत्वपूर्ण ऊर्जा पूर्वाधारहरू निशानामा परेका छन्।
यी आक्रमणपछि साउदी अरेबियाले कडा प्रतिक्रिया दिँदै क्षेत्रीय सुरक्षा अवस्था गम्भीर बनेको जनाएको छ। रियादले इरानसँगको कूटनीतिक विश्वास कमजोर बन्दै गएको उल्लेख गर्दै अब संवादभन्दा टकरावतर्फ परिस्थिति धकेलिन सक्ने चेतावनी दिएको छ।
ऊर्जा क्षेत्रमा भएको प्रहारले विश्व बजारमा तेल र ग्यास आपूर्तिमा अस्थिरता बढ्ने संकेत देखिएको छ। कतार र साउदी अरेबिया दुवै विश्वका प्रमुख ऊर्जा आपूर्तिकर्ता भएकाले यसको असर अन्तर्राष्ट्रिय बजारमा पर्ने विश्लेषण गरिएको छ।
इरानले अमेरिकाका सैन्य अड्डा रहेका देशहरू—कतार, यूएई र साउदी अरेबियामाथि दबाब बढाउँदै आएको छ। सुरुमा अमेरिकी सैन्य संरचनामा लक्षित आक्रमण अहिले ऊर्जा पूर्वाधारतर्फ मोडिएको देखिन्छ।
यसैबीच कतारको प्रमुख ग्यास उत्पादन केन्द्र रास लाफानमा भएको आक्रमणबाट भौतिक क्षति पुगेको कतारी अधिकारीहरूले पुष्टि गरेका छन्। विश्वकै महत्वपूर्ण तरल प्राकृतिक ग्यास केन्द्रमध्ये एक मानिने यस स्थानमा भएको क्षतिले उत्पादन र आपूर्ति प्रणाली प्रभावित भएको जनाइएको छ।
घटनापछि कतारले कूटनीतिक कदम चाल्दै इरानी दूतावासका सैन्य तथा सुरक्षा अधिकारीहरूलाई ‘पर्सोना नन ग्राटा’ घोषणा गरेको छ, जसअनुसार उनीहरूले देश छाड्नुपर्ने हुन्छ।
इरानले बदलाको रणनीतिसहित आक्रामक कदम चालिरहँदा मध्यपूर्वमा द्वन्द्व अझै फैलिने संकेत देखिएको छ, जसले खाडी क्षेत्रका देशहरू प्रत्यक्ष रूपमा प्रभावित पार्न थालेका छन्।
