महिलाहरूको अश्लील भिडियो बनाएर बिक्री वितरण गर्ने कार्यमा संलग्न एक जनालाई प्रहरीले पक्राउ गरेको छ।
पक्राउ पर्नेमा सुर्खेतको वीरेन्द्रनगर नगरपालिका-६ घर भई हाल काठमाडौंको टोखा नगरपालिका, ग्राण्डी बस्दै आएका २९ वर्षीय रमेश थापा रहेका छन् ।
प्रहरीका अनुसार, थापाले र नेपाल तथा विदेशमा रहेका नेपाली महिला तथा पुरुषहरूलाई भिडियो कलमार्फत अश्लील क्रियाकलापमा संलग्न गराउने र त्यसको भिडियो बनाएर बिक्री गर्ने गरेको प्रारम्भिक अनुसन्धानबाट खुलेको छ।
विशेष सूचनाको आधारमा जिल्ला प्रहरी परिसर, काठमाडौंबाट खटिएको प्रहरी टोलीले उनलाई असार १३ गते पक्राउ गरेको हो ।
पक्राउ परेका थापाविरुद्ध मुलुकी अपराध संहिता, २०७४ को दफा १२१ बमोजिम ‘अश्लील किताब, पर्चा इत्यादि बनाउन वा बिक्री गर्न नहुने’ कसुरमा मुद्दा दर्ता गरिएको छ।
जिल्ला अदालत, काठमाडौंबाट ५ दिनको म्याद थप गरी उनीमाथि थप अनुसन्धान भइरहेको जिल्ला प्रहरी परिसरका सूचना अधिकारी, प्रहरी उपरीक्षक (एसपी) अपिल राज बोहराले जानकारी दिएका छन ।
