१ चैत,काठमाडौं - नेपालको पश्चिमी क्षेत्रमा बिहानैदेखि वर्षा सुरु भएको छ। जल तथा मौसम विज्ञान विभागका अनुसार पश्चिमी न्यूनचापीय प्रणालीको प्रभावले वर्षा विस्तारै पूर्वतर्फ सर्दै गएको छ। काठमाडौंमा अहिले हुरीबताससहित कालो बादल मडारिएको छ भने केही स्थानमा पानी परिरहेको छ।
विभागका सूचना अधिकारी दिनकर कायस्थले डडेलधुरा, डोटी, अछाम, बाजुरा, बझाङ, गुल्मी, कास्की, तनहुँ, पाल्पा, अर्घाखाँची र मनाङलगायत पश्चिमी तथा मध्यपहाडी जिल्लामा आज बिहानैदेखि वर्षा भइरहेको जानकारी दिए। उनका अनुसार वर्षा गराउने यो प्रणाली अहिले चितवनसम्म आइपुगेको छ।
पछिल्लो एक घण्टामा गुल्मीमा १७ मिलिमिटर र तनहुँमा ११ मिलिमिटर वर्षा भएको छ। देशका अन्य भूभागमा मौसम सामान्यतः बदली र आंशिक बादल लाग्ने देखिएको छ।
हाल मधेश, बागमती, लुम्बिनी, कर्णाली र सुदूरपश्चिम प्रदेशमा साधारण बादल लागेको छ भने कोशी र गण्डकी प्रदेशमा आंशिक बादल छ। तराई र उपत्यकाका केही स्थानमा हल्का हुस्सु पनि परेको विभागले जनाएको छ।
विभागले जारी गरेको मौसम बुलेटिन अनुसार गण्डकी, लुम्बिनी, कर्णाली, सुदूरपश्चिम प्रदेशसहित कोसी र बागमती प्रदेशका पहाडी तथा हिमाली भूभागमा साधारण बादल रहनेछ। बाँकी भूभागमा आंशिक बादल रहने अनुमान छ।
साथै, देशका केही हिमाली भूभागमा मेघगर्जन/चट्याङसहित मध्यम वर्षा हुने सम्भावना रहेको छ भने थोरै स्थानमा हिमपात पनि हुन सक्छ। लुम्बिनी, कर्णाली र सुदूरपश्चिमका पहाडी भूभाग, कोसी, बागमती र गण्डकीका केही पहाडी क्षेत्र तथा लुम्बिनी र सुदूरपश्चिमका तराईका एक-दुई स्थानमा मेघगर्जन/चट्याङसहित वर्षा हुने सम्भावना छ।
मौसमको यो बदली अझै केही दिन कायम रहने अनुमान छ।
