इरानको आक्रमण जारी: साउदीका तेल केन्द्रमा बिहानै ड्रोन प्रहार
साझा लाल्टिन संवाददाता
20 March 2026
०६ चैत,काठमाडौं - खाडी क्षेत्रमा तनाव चर्किँदै जाँदा शुक्रबार बिहान मात्रै साउदी अरेबियाले २२ वटा ड्रोन खसालेको जनाएको छ। अन्तर्राष्ट्रिय सञ्चारमाध्यमका अनुसार यी ड्रोनहरू मुख्यतः तेल प्रशोधन केन्द्र लक्षित गरेर पठाइएका थिए।
कुवेत र अरब इमिरेट्सले पनि क्षेप्यास्त्र तथा ड्रोन आक्रमणको जोखिमसँग जुधिरहेको बताएका छन्। उता बहराइनको आन्तरिक मन्त्रालयले इरानी आक्रमणपछि गोदाममा आगलागी भएको पुष्टि गरेको छ।
साउदी रक्षा मन्त्रालयका अनुसार अधिकांश ड्रोन पूर्वी प्रान्तका ऊर्जा पूर्वाधार नजिकै खसालिएका थिए भने एउटा उत्तरी अल-जौफ क्षेत्रमा रोकिन सफल भएको थियो। यस अघि लाल सागर क्षेत्रमा रहेको तेल प्रशोधन केन्द्रमा ड्रोन प्रहार भएको र कुवेतका विभिन्न स्थानमा आगलागी भएको घटना सार्वजनिक भइसकेको छ।
Iran ले आफ्नो दक्षिण पार्स ग्यास क्षेत्रमा इजरायले गरेको आक्रमणको बदला स्वरूप कतारको ठूलो ग्यास संरचनालाई निशाना बनाएको दाबी गरिएको छ।
फेब्रुअरी २८ यता मात्रै साउदी अरेबियामाथि ५०० भन्दा बढी ड्रोन आक्रमण प्रयास भएको बताइएको छ। साउदी वायु रक्षाले सो अवधिमा ४२ ब्यालिस्टिक र सात क्रूज क्षेप्यास्त्र पनि निष्क्रिय पारिसकेको जनाएको छ।
